ಬೆಂಗಳೂರು: ‘ಪವರ್ಸ್ಟಾರ್’ ಪುನೀತ್ ರಾಜಕುಮಾರ್ ಅವರ ಕೊನೇ ಸಿನಿಮಾ ‘ಜೇಮ್ಸ್’ ಆಗಮನಕ್ಕೆ ಇನ್ನೊಂದೇನ ದಿನ ಬಾಕಿ. ಇದೇ 17ರಂದು ಅಪ್ಪು ಬರ್ತ್ಡೇ ಪ್ರಯುಕ್ತ ರಾಜ್ಯ, ದೇಶ ಮಾತ್ರವಲ್ಲ ವಿಶ್ವದಾದ್ಯಂತ ಚಿತ್ರ ಬಿಡುಗಡೆ ಆಗುತ್ತಿದೆ. ಸಾವಿರಾರು ತೆರೆಗಳ ಮೇಲೆ ಪುನೀತ್ ಅವರನ್ನು ಕಣ್ತುಂಬಿಕೊಳ್ಳಲು ಅಭಿಮಾನಿಗಳು ಚಾತಕ ಪಕ್ಷಿಯಂತೆ ಕಾಯುತ್ತಿದ್ದಾರೆ.
ವಿಶ್ವಾದ್ಯಂತ 4 ಸಾವಿರ ಶೋಗಳು: ಸದ್ಯದ ಪ್ಲಾನ್ ಪ್ರಕಾರ ಪ್ರಪಂಚದಾದ್ಯಂತ ಒಟ್ಟು ನಾಲ್ಕು ಸಾವಿರ ಶೋಗಳು ‘ಜೇಮ್ಸ್’ಗೆ ಸಿಕ್ಕಿವೆ. ಪುನೀತ್ ಅವರ ಸಿನಿಮಾ ಕೆರಿಯರ್ನಲ್ಲಿಯೇ ಅತ್ಯಧಿಕ ಶೋಗಳು ಈ ಚಿತ್ರಕ್ಕೆ ಸಿಕ್ಕಿರುವುದು ಮತ್ತೊಂದು ವಿಶೇಷತೆ. ಅಮೆರಿಕಾ, ಆಸ್ಟ್ರೇಲಿಯಾ, ಸಿಂಗಾಪುರ, ಮಲೇಷಿಯಾ, ಉಗಾಂಡ, ದುಬೈ, ಕತಾರ್, ರಷ್ಯಾ, ಶ್ರೀಲಂಕಾ ಹೀಗೆ ಇನ್ನೂ ಹಲವು ದೇಶಗಳಲ್ಲಿ ಚಿತ್ರ ಬಿಡುಗಡೆ ಆಗಲಿದೆ.
ಕರ್ನಾಟಕದಲ್ಲಿ ಬೆಳಗ್ಗೆ 6ರಿಂದಲೇ ಶೋ ಶುರು: ಪುನೀತ್ ಸಿನಿಮಾ ಬಿಡುಗಡೆ ಆಗುತ್ತಿದೆ ಎಂದರೆ ಅಭಿಮಾನಿ ವಲಯದಲ್ಲಿ ದೊಡ್ಡ ಮಟ್ಟದ ಕ್ರೇಜ್ ಇದ್ದಿದ್ದೇ. ಅದೇ ರೀತಿ ಜೇಮ್ಸ್’ ಮೇಲೆ ಅದೆಲ್ಲದಕ್ಕಿಂತ ದೊಡ್ಡ ಸೆಂಟಿಮೆಂಟ್ ಕರ್ನಾಟಕದಲ್ಲಿ ಸೃಷ್ಟಿಯಾಗಿದೆ. ಈ ಹಿಂದಿನ ಸಿನಿಮಾಗಳಂತೆ ಈ ಸಲವೂ ಬೆಳಗ್ಗೆ 6ರಿಂದಲೇ ಜೇಮ್ಸ್’ ಮೊದಲ ಶೋ ಶುರುವಾಗಲಿದೆ. ಈಗಾಗಲೇ ಬೆಂಗಳೂರು, ಮೈಸೂರು ಸೇರಿ ಹಲವೆಡೆಗಳಲ್ಲಿ ಚಿತ್ರದ ಟಿಕೆಟ್ ಸಹ ಸೋಲ್ಡ್ ಔಟ್ ಆಗಿವೆ. ವಿಶೇಷ ಏನೆಂದರೆ ಮೈಸೂರಿನಲ್ಲಿ 5 ಸಿಂಗಲ್ ಸ್ಕ್ರೀನ್ ಚಿತ್ರಮಂದಿರಗಳು ಮತ್ತು ಮೂರು ಮಲ್ಟಿಫ್ಲೆಕ್ಸ್ಗಳಲ್ಲಿ ಮೊದಲ ದಿನದ ಟಿಕೆಟ್ಗಳು ಈಗಾಗಲೇ ಬಿಕರಿಯಾಗಿವೆ. ಮೈಸೂರಿನ ಇತಿಹಾಸದಲ್ಲಿಯೇ ಈ ರೀತಿ ಆಗಿದ್ದು ಇದೇ ಮೊದಲ ಬಾರಿಯಂತೆ.
ವೀರೇಶ್ ಚಿತ್ರಮಂದಿರ ಅಪ್ಪುಮಯ: ಮಾಗಡಿ ರಸ್ತೆಯಲ್ಲಿರುವ ವೀರೇಶ್ ಚಿತ್ರಮಂದಿರ ಅಕ್ಷರಶಃ ಅಪುಪಮಯವಾಗಿದೆ. ಅದಕ್ಕೆ ಕಾರಣ ಪುನೀತ್ ಕಟೌಟ್ಗಳು. ಇದೇ ಮೊದಲ ಸಲ ಅಭಿಮಾನಿಗಳೆಲ್ಲ ಸೇರಿ ಪುನೀತ್ ನಾಯಕನಾಗಿ ನಟಿಸಿರುವ 31 ಸಿನಿಮಾಗಳ ಕಟೌಟ್ಗಳನ್ನು ವೀರೇಶ್ ಚಿತ್ರಮಂದಿರದಲ್ಲಿ ಅಳವಡಿಸಲಾಗಿದೆ. ‘ಅಪ್ಪುʼ ಚಿತ್ರದಿಂದ ‘ಜೇಮ್ಸ್’ ಚಿತ್ರದ ಕಟೌಟ್ಗಳನ್ನು ಕಾಣಬಹುದಾಗಿದೆ. ಕನ್ನಡ ಸಿನಿಮಾದ ಇತಿಹಾಸದಲ್ಲಿಯೇ ಇಂಥ ಪ್ರಯತ್ನ ಹಿಂದೆಂದೂ ಆಗಿಲ್ಲ ಎನ್ನಲಾಗುತ್ತಿದೆ. ಈ ಬಗ್ಗೆ ಮಾಹಿತಿ ನೀಡುವ ವೀರೇಶ್ ಚಿತ್ರಮಂದಿರದ ಮಾಲೀಕ, ಕೆ.ವಿ, ಚಂದ್ರಶೇಖರ್, ‘ಅಪುಪ ಅವರು ಇಲ್ಲ ಎಂಬ ನೋವನ್ನು ಅವರ ಅಭಿಮಾನಿಗಳು ಈ ರೀತಿಯಲ್ಲಿ ತೋರ್ಪಡಿಸುತ್ತಿದ್ದಾರೆ’ ಎಂದಿದ್ದಾರೆ.
ರಾಜ್ಯದಲ್ಲಿ ಜೇಮ್ಸ್ಗೆ 400 ಚಿತ್ರಮಂದಿರ: ಕರ್ನಾಟಕದಲ್ಲಿ 600 ಪ್ಲಸ್ ಚಿತ್ರಮಂದಿರಗಳಿವೆ. ಆ ಪೈಕಿ 400ಕ್ಕೂ ಅಧಿಕ ಥಿಯೇಟರ್ಗಳಲ್ಲಿ ಜೇಮ್ಸ್ ಚಿತ್ರ ತೆರೆಕಾಣಲಿದೆ. ಅಪ್ಪು ಕೊನೇ ಚಿತ್ರ ಎಂಬ ಕಾರಣಕ್ಕೆ ಬಹುಪಾಲು ಪ್ರದರ್ಶಕರು ಸಿನಿಮಾ ಪ್ರದರ್ಶನಕ್ಕೆ ಮುಂದಾಗಿದ್ದಾರೆ.
ಅಮೆರಿಕಾ, ಆಸ್ಟ್ರೇಲಿಯಾದಲ್ಲಿ ದಾಖಲೆ: ವಿದೇಶಗಳಲ್ಲಿ ಕನ್ನಡ ಸಿನಿಮಾಗಳು ಬಿಡುಗಡೆ ಆಗುವುದು ಹೊಸತೇನಲ್ಲ. ಆದರೆ, ಜೇಮ್ಸ್ ಬೇರೆ ರೀತಿಯ ದಾಖಲೆಯೊಂದನ್ನೇ ಬರೆದಿದೆ. ವಿದೇಶಗಳಲ್ಲಿ ಕನ್ನಡದ ಸಿನಿಮಾಗಳಿಗೆ ಬೆರಳೆಣಿಕೆ ಶೋಗಳು ಮಾತ್ರ ಸಿಗುತ್ತಿದ್ದವು. ಇದೀಗ ಆಸ್ಟ್ರೇಲಿಯಾವೊಂದರಲ್ಲಿಯೇ ಮೊದಲ ಸಲ 150 ಸ್ಕ್ರಿನ್ಗಳ ಮೇಲೆ ಅಪ್ಪು ಅಬ್ಬರಿಸಲಿದ್ದಾರೆ. ಅಮೆರಿಕಾದ 32 ರಾಜ್ಯಗಳ 72 ನಗರಗಳಲ್ಲಿ 175ಕ್ಕೂ ಅಧಿಕ ಶೋಗಳು ಜೇಮ್ಸ್ಗೆ ಸಿಕ್ಕಿವೆ. ಈವರೆಗೂ ಕನ್ನಡ ಚಿತ್ರಗಳನ್ನು ಈ ದೇಶಗಳಲ್ಲಿ ಸೆನ್ಸಾರ್ ಮಾಡುತ್ತಿರಲಿಲ್ಲ. ಇದೇ ಮೊದಲ ಬಾರಿಗೆ ಕನ್ನಡದ ಜೇಮ್ಸ್’ ಸಿನಿಮಾಕ್ಕೆ ಮೊದಲ ಬಾರಿ ಸೆನ್ಸಾರ್ ಸಹ ಮಾಡಲಾಗಿದೆ.